ഭിന്നശേഷി പുരസ്കാരത്തിന് നോമിനേഷന്‍ ക്ഷണിച്ചു ?

ഭിന്നശേഷി മേഖലയിൽ മികച്ച പ്രവർത്തനങ്ങൾ കാഴ്ചവെച്ച വ്യക്തികൾക്കും സ്ഥാപനങ്ങൾക്കും സാമൂഹ്യനീതി വകുപ്പ് ഏർപ്പെടുത്തിയ സംസ്ഥാന ഭിന്നശേഷി അവാർഡ് 2025-നുള്ള നോമിനേഷനുകൾ ക്ഷണിച്ചു. ഈ സാമ്പത്തിക വർഷം 16 വിഭാഗങ്ങളിലായി 30 അവാർഡുകളാണ് നൽകുന്നത്. ക്യാഷ് അവാർഡും സർട്ടിഫിക്കറ്റും മൊമന്റോയും അവാർഡിനൊപ്പം ലഭിക്കും. ഭിന്നശേഷി മേഖലയിൽ മികച്ച പ്രകടനം കാഴ്ചവെച്ച മികച്ച ജീവനക്കാർ (സർക്കാർ/പൊതുമേഖല, സ്വകാര്യമേഖല), സ്വകാര്യമേഖലയിൽ ഏറ്റവും കൂടുതൽ ഭിന്നശേഷിക്കാർക്ക് തൊഴിൽ നൽകിയ തൊഴിൽദാതാക്കൾ, മികച്ച എൻ.ജി.ഒ സ്ഥാപനങ്ങൾ, പുനരധിവാസ കേന്ദ്രങ്ങൾ, മികച്ച മാതൃകാ വ്യക്തി, മികച്ച സർഗാത്മക കഴിവുള്ള കുട്ടി, കല/സാഹിത്യം/കായിക മേഖലയിൽ നേട്ടങ്ങൾ കൈവരിച്ച വ്യക്തികൾ, ഭിന്നശേഷി സൗഹൃദ സ്ഥാപനങ്ങൾ, വിദ്യാഭ്യാസ സ്ഥാപനങ്ങൾ എന്നിവർക്കാണ് അവാർഡ് നൽകുന്നത്. ഇതിനുപുറമെ, ഭിന്നശേഷി മേഖലയിൽ മികച്ച പ്രകടനം കാഴ്ചവെച്ച ജില്ലാ പഞ്ചായത്ത്, ജില്ലാ ഭരണകൂടം, കോർപ്പറേഷൻ, മുനിസിപ്പാലിറ്റി, ബ്ലോക്ക് പഞ്ചായത്ത്, ഗ്രാമപഞ്ചായത്ത് എന്നിവയും അവാർഡിന് അർഹരാണ്. സെപ്റ്റംബർ 15-ന് വൈകുന്നേരം അഞ്ചു  മണി വരെ നോമിനേഷനുകൾ സ്വീകരിക്കും. അവാർഡിനായി വ്യക്തികളും സ്ഥാപനങ്ങളും നേരിട്ട് അപേക്ഷ നൽകാൻ പാടില്ല. ബന്ധപ്പെട്ട മേഖലകളിലെ ഉദ്യോഗസ്ഥർക്ക് അർഹരായവരെ നോമിനേറ്റ് ചെയ്യാവുന്നതാണ്.  ഭിന്നശേഷി മേഖലയിൽ മികച്ച പ്രകടനം കാഴ്ചവെച്ച ജില്ലാ ഭരണകൂടം, കോർപ്പറേഷൻ, ജില്ലാ പഞ്ചായത്ത് എന്നിവയുടെ നോമിനേഷൻ സാമൂഹ്യനീതി ഡയറക്ടറേറ്റിൽ നേരിട്ട് സമർപ്പിക്കണം. മറ്റുള്ളവ ജില്ലാ സാമൂഹ്യനീതി ഓഫീസിലാണ് സമര്‍പ്പിക്കേണ്ടത്.  അവാർഡ് സംബന്ധിച്ച വിശദാംശങ്ങളും നോമിനേഷൻ ഫോമുകളും www.swdkerala.gov.in എന്ന വെബ്‌സൈറ്റിലും ജില്ലാ സാമൂഹ്യനീതി ഓഫീസിലും ലഭിക്കും.

"Please give a comment about this post; also forward this post your dearest friends and relatives. thanks" !!